நாடாளுமன்ற உறுப்பினர் அர்ச்சுனா இராமநாதன், நாடாளுமன்ற உறுப்பினராகப் பணியாற்றுவதற்கான தகுதியை எதிர்த்துத் தாக்கல் செய்யப்பட்ட நீதிப்பேராணை மனு மீதான வாதங்களைக் கேட்பதற்காக, மேல்முறையீட்டு நீதிமன்றம் ஆகஸ்ட் 31ஆம் திகதியை நிர்ணயித்துள்ளது.
இது குறித்த வழக்கு இன்றையதினம் மேல்முறையீட்டு நீதிமன்றத்தின் முன் விசாரணைக்கு வந்த போதிலும், அமர்வு முறையாக அமைக்கப்படாததால் ஒத்திவைக்கப்பட்டது.
நாடாளுமன்ற உறுப்பினர் இராமநாதன் அரசாங்க மருத்துவ அதிகாரியாகப் பணியாற்றி வந்தபோதே, சமீபத்திய பொதுத் தேர்தலுக்கான தனது வேட்புமனுவைத் தாக்கல் செய்தார் என குற்றம்சாட்டி, அபிநவ நிவாஹல் பெரமுனவின் தலைவர் ஓஷால ஹெரத் இந்த மனுவைத் தாக்கல் செய்திருந்தார்.
அரசுப் பணியிலிருந்து முதலில் விலகாமல் வேட்புமனுக்களைத் தாக்கல் செய்வது நாடாளுமன்றத் தேர்தல் சட்டத்தை மீறுவதாகும் என்று மனுதாரர் வாதிட்டதோடு, அந்த நாடாளுமன்ற உறுப்பினர் சட்டப்படி பதவி வகிக்கத் தகுதியற்றவர் என அறிவிக்கக் கோரியிருந்தார்.
மனுதாரரின் வழக்கறிஞர், இந்த வழக்கை கூடிய விரைவில் விசாரணைக்கு எடுத்துக்கொள்ளுமாறு விடுத்த கோரிக்கையைத் தொடர்ந்து, நீதிமன்றம் இந்த வழக்கை ஆகஸ்ட் 31ஆம் திகதி அன்று வாதங்களுக்காகப் பட்டியலிட்டு அதற்கு முன்னுரிமை அளித்தது.
மனுதாரர் சார்பில் சட்ட ஆலோசகர் என்.கே. அசோக்பரன், ஷெனல் பெர்னாண்டோவுடன் முன்னிலையாகினர்.
நாடாளுமன்ற உறுப்பினர் அர்ச்சுனா இராமநாதன் சார்பில் சட்ட ஆலோசகர் சேனானி தயரத்ன, நிஷாதி விக்ரமசிங்கவுடன் முன்னிலையாகியிருந்தமை குறிப்பிடத்தக்கது.